قلب الوطن موجوع !

في ليله من ليالي الصيف كنت ماشي أشم شويه هواء وفجأه لقيت مصر

ماشيه وماسكه في ايدها اليمين ابنها النيل والشمال ولادها الأهرمات الثلاثة

وكانت في منتهي الحزن والكئابه .رميت عليها السلام ردت عليا بعدم

اهتمام سألتها مالك يا امي

مصر :بتسألني مالى انت مش شايف اللي أنتم بتعملوه فيا.

قلتلها دا احنا ولادك وبنحبك .

مصر/ بتحبوني ماهو باين شدة حبكم ليا واللي بيحب أمه يهينها ويشتمها

ويخرب فيها ويجعل سيرتها علي كل لسان دا أنا حضناكم ومحوطة عليكم

وبحافظ عليكم من ألاف السنين أنا مصر مش أمكم بس دا أنا كنت أم الدنيا

.دلوقتي أصبحت ملطشة الدنيا وولادها هما اللي عاملين كدة فيها دي

اخرتها أول ما تكبروا تعضوا أيدي أخر حاجه سمعتها من بره أنهم عايزين

ياخدوا بنتي الكبيره سيناء ويفصلوهاعني ليه يا ولادي عايزين تقطعوا فيه

عايزين تضعفوني ولا عايزين تكسروني مش أنا اللي عيالها تكسرها كان

الهكسوس قدروا عليا ولا المغول أو الانجليز أنا اللي هنتهم وانا اللي

كسرتهم أسأل عيالي دول الهرم والنيل كام سنه وانا حضناهم ومحوطة

عليهم أسألهم عمري تخليت عنهم هما دول اللي شايلين الجميل .من شهور

بيحاولوا يقنعوني إني ممشيش خلاص أنا فاض بيا وماشيه سيباكم .وروني

هتجيبوا مصر تانيه منين هتجيبوا أم زيي منين .النيل والهرم قالوا لو مشيتي

هنمشي معاكي

قلتلها أبوس ترابك متسيبيناش احنا بنحبك ارجعي تاني يا امي لمينا

واحضنينا وداري علينا .

مصر :إبعد عني كلكم بتقولوا نفس الكلام بنحبك يا مصر وانتم مبتحبوش

غير نفسكم سابتني ومشيت كنت ببكي وأصرخ وبنده عليها .

لفت وبصتلي بعد ما كان الحزن مالي وشها لقيت الغضب طالع من عنيها

وقالت لي أنا هرجع لكن لما أرجع حتكون رجعه عفيه مش هيهمني ولادي

ولا احفادي هدوس علي كل من أذاني وأهاني

لكى الله يا مصر

» ***ذهاب دون رجوع وقلب موجوع ***